U Rwanda na RDC mu biganiro

U Rwanda na Congo bari mu nzira yo kuganira ku mutekano

• #politike

• 2024-11-06

• Journalist
• Yarebwe 40.1 K

U Rwanda na Repubulika Iharanira Demokarasi ya Congo, biyemeje gushyiraho urwego rw’abasirikare rushinzwe kugenzura iyubahirizwa ry’agahenge ko muri Kanama 2024 gasaba ihagarikwa ry’imirwano mu Burasirazuba bwa Congo.

Abagize uru rwego barimo abasirikare 18 ba Angola 3 b’u Rwanda na 3 ba Congo.
Ni umwanzuro wafatiwe i Goma mu nama yahuje ba Minisitiri w’Ububanyi n’Amahanga ba Congo n’u Rwanda ndetse n’uwa Angola.
Minisitiri w’Ububanyi n’Amahanga w’u Rwanda, Ambasaderi Olivier Nduhungirehe yatangaje ko bakurikije ibyavugiwe mu biganiro ku mpande zombi hari icyizere cyo kugarura umutekano mu Burasirazuba bwa DRC.

Uru rwego rushyizweho nyuma yaho mu byumweru 2 bishize imirwano yongeye kubura hagati ya M23 na FARDC n’imitwe bakorana irimo FDLR na Wazalendo.
N’ubu imirwano irakomeje muri teritwari ya Masisi muri Kivu y’Amajyaruguru.

Icyemezo cyo guhagarika imirwano cyafatiwe mu biganiro byahuje abahagarariye guverinoma ya RDC, iya Angola n’iy’u Rwanda, ubwo bahuriraga i Luanda tariki ya 30 Nyakanga 2024.
Amasezerano ya Louanda yasabye impande zombi guhagarika imirwano guhera tariki ya 4 Kanama 2024.