Urwego rw’Iterambere mu Rwanda (RDB), rwatangaje ko amafaranga ubukerarugendo bwinjije yiyongereyeho 25%, ava kuri miliyoni
131$ agera kuri miliyoni 164$ mu 2021.
Guverinoma y’u Rwanda yashyizeho ingamba zitandukanye zigamije kubuzahura binyuze mu Kigega Nzahurabukungu cyashyizwemo Miliyoni 100$ ku ikubitiro, icya kabiri cyayo agenerwa urwego rwo kwakira abantu n’ubukerarugendo.
Nibura 50% yashyizwe mu rwego rw’amahoteli, afatwa nka kimwe mu byiciro by’ingenzi mu bijyanye n’ubukerarugendo.
Umubare w’abagenzi binjira mu gihugu wiyongereyeho 2,8% muri uwo mwaka, uva kuri 490.000 binjiye mu gihugu mu 2020 ugera ku 512.000 mu 2021.
Ibikorwa by’imikino ni byo byagize uruhare mu kuzamura uwo mubare w’abagenzi, kuko u Rwanda rwakiriye amarushanwa arimo Basketball Africa League (BAL), Igikombe cya Afurika cya Volleyball mu bagabo n’abagore n’imikino nyafurika muri Basketball, FIBA AfroBasket 2021.
Urwego rwo kwakira inama n’ibirori rwo rwinjije miliyoni 12,5$ mu 2021 avuye kuri miliyoni 5,4$ yabonetse mu 2020.
Uko ubukerarugendo bwazahukaga, imibare igaragaza ko inzego nyinshi zateye imbere mu mwaka ushize.
Urugero nko mu byoherezwa mu mahanga, na byo byiyongereye ku kigero cya 6,5% biva kuri miliyoni 1,89$ mu 2020 bigera kuri miliyoni 2,01$ mu 2021.
Mu bijyanye no kongera ubumenyi, abantu barenga 5000 bahawe amahugurwa mu bijyanye n’ikoranabuhanga, ubumenyi mu bijyanye n’amakuru [data science], engineering, ubukerarugendo, ubucuruzi bukoresheje ikoranabuhanga n’ibindi.
Muri iyo gahunda, nibura abarangije amasomo 1400 bafashijwe kubona amahugurwa mu mwuga mu bigo bya leta n’ibyigenga. Ni mu gihe ibigo bito n’ibiciriritse birenga 1000 byafashijwe kugera kuri serivisi z’imari mu bigo bitandukanye.
Ni mu gihe ibigo bito n’ibiciriritse 8500 byafashijwe bigahabwa amahugurwa agamije kongera ubumenyi mu byo bakora. Muri bo 85% babashije gukorana n’ibigo by’imari byiganjemo SACCO.
Umuyobozi Mukuru wa RDB, Clare Akamanzi, yatangaje ko iri zamuka ry’ishoramari rigaragaza imbaraga zashyizwe mu kuzahura ubukungu bw’u Rwanda.
Ati "Mu kwandika ishoramari, usibye kwandika ishoramari riri hejuru kurusha mbere y’icyorezo cya Covid-19, twabashije kwandika ishoramari rinini kugeza ubu. Kugera kuri iyi ntego, mu bihe by’icyorezo cyahungabanyije ubukungu bw’Isi, ni ikimenyetso cy’uko abashoramari badufitiye icyizere".
Tanga Igitekerezo